"ຄ່າໄຟ" ສັດຕູຂອງກະເປົາເງິນ

ຂ້ອຍເຊື່ອວ່າຫຼາຍໆຄົນທີ່ຢູ່ ມະຫາວິທະຍາໄລຊູ່ໂຈ່ຕ້ອງເຄີຍມີປະສົບການນີ້:​

ເມື່ອຮອດສິ້ນເດືອນ, ເງິນເດືອນທີ່ອອກມາແຕ່ຕົ້ນເດືອນກຳລັງຈະໝົດ, ອັນຊິກິນໃນຕູ້ເຢັນກະບໍ່ມີ, ແຖມຍັງມີໝູ່ຊວນໄປຫຼິ້ນອີກ, ຊ້ຳບໍ່ໜຳຄ່າໄຟກະໄກ້ຊິຮອດເວລາປະກົດກາຍອອກມາແລ້ວ, ເຊິ່ງຕົວເລກມັນກະບີບຫົວໃຈເຫຼືອເກີນ T-T, ສະຖານະການທີ່ມັນຂ້ອນຂ້າງຈະບີບຮັດແບບນີ້ ບວກກັບຄວາມຄິດທີ່ຢາກຕໍ່ຕ້ານຄ່າໄຟແພງ, ເລີຍຕັດສິນໃຈຖ້າອ່າຢີຕັດໄຟຈຶ່ງໄປຈ່າຍເງິນ 5555 (ຫາເຫົາໃສ່ຫົວແທ້ໆ).

ແຕ່ສິ່ງທີ່ເຮັດໃຫ້ຂ້ອຍເຊັງກ່ອນຫັ້ນກະຄື ພວກທີ່ມັນຢູ່ຂ້າງໆຫ້ອງ ທີ່ໃຊ້ໄຟຊ່ຳກັນ, ແຖມເປີດເຄື່ອງໃຊ້ໄຟຟ້າໄວ້ໝົດມື້ ຊ້ຳພັດຄ່າໄຟບໍ່ຮອດ 10 ຢວນ, ບາງຫ້ອງແຮງ 5 ຢວນ, 0 ຢວນກະມີ (ຄິດສົງໄສ: “ຕົກລົງແມ່ນມັນໄຕ້ທຽນຢູ່ແມ່ນບໍ່?”) ໂຕເລກທີ່ມັນໂຕນກັນຈັ່ງຊີ້ ສ້າງຄຳຖາມໃຫ້ຂ້ອຍຖາມໂຕເອງຊ້ຳໄປຊ້ຳມາວ່າ “ຄ່າໄຟໂຮງຮຽນເຮົາແມ່ນຄິດໄລ່ແນວໃດແທ້”

ເພື່ອຕອບບັນຫານີ້ ຂ້ອຍເລີຍນັ່ງຕັດສິນໃຈຢູ່ໃນຫ້ອງວ່າຊິໄປຖາມວິທີຄິດໄລ່ນຳອ່າຢີ. ໂຊກດີທີ່ເດືອນແລ້ວນີ້ຂ້ອຍຈ່າຍຄ່າໄຟຖືກເວລາ ເລີຍສາມາດແບກໜ້າໄປຖາມລາວໄດ້. ແລ້ວລາວກໍ່ອະທິບາຍໃຫ້ຂ້ອຍຟັງຈົນຈັບໃຈພາຍໃນເວລາພຽງ 10 ນາທີ.

ເຊິ່ງມື້ນີ້ຂ້ອຍຊິມາຂຽນສູ່ທຸກຄົນຟັງໃຫ້ເຂົ້າໃຈ.

ກ່ອນທີ່ຈະເຂົ້າໃຈວິທີຄິດໄລ່ຢູ່ໂຮງຮຽນເຮົາຕ້ອງເຂົ້າໃຈພື້ນຖານວິທີຄິດໄລ່ຄ່າໄຟຢູ່ບ້ານເຮົາກ່ອນເນາະ, ເພື່ອໃຫ້ເຂົ້າໃຈງ່າຍຂຶ້ນ.

ເຊິ່ງວິທີການຄິດໄລ່ຄ່າໄຟຢູ່ບ້ານເຮົາແມ່ນຈະອີງຕາມມາດຕະຖານ 1KWh/700ກີບ (ຄ່າປະມານ) ເປັນໂຕຄິດໄລ່. ຫຼາຍຄົນເຫັນໂຕເລກລະຊິສົງໄສວ່າ “1KWh” ມັນແມ່ນຫຍັງ ?. ຂ້ອຍຊິບອກງ່າຍໆເລີຍວ່າມັນໝາຍເຖິງປະລິມານໄຟຟ້າທີ່ເຮົາໃຊ້ທັງໝົດ, ເຊິ່ງເອີ້ນເປັນພາສາລາວວ່າ “ກິໂລວັດໂມງ”. ການຄິດໄລ່ຫາ ກິໂລວັດໂມງ ໃນກົດເກນວາດທະຍາສີ (ວິທະຍາສາດ, 55555) ແມ່ນຂ້ອນຂ້າງສັບສົນ, ຄັ້ນຊິໃຫ້ຂ້ອຍຂຽນໃຫ້ຟັງກະຄືຊິໃຊ້ເວລາດົນ (ຊິຂຽນໃຫ້ຟັງມື້ໜ້າ).

ເອົາເປັນວ່າເຮົາເຂົ້າໃຈແລ້ວວ່າມູນຄ່າໄຟຢູ່ລາວແມ່ນປະມານ 1KWh/700ກີບ.

ກັບມາທີ່ປະເດັນ, ແລ້ວຄ່າໄຟຢູ່ມະຫາວິທະຍາໄລຊູ່ໂຈ່ເຂົາເຈົ້າເອົາມາດຕະຖານເທົ່າໃດ?

ອ່າຢີບອກຂ້ອຍວ່າມາດຕະຖານຄ່າໄຟແມ່ນ “1度/0.6ຢວນ” , ຄົນຈີນເຂົາເຈົ້າເອີ້ນ “KWh” ວ່າ “度”. ຄັນຊັ້ນກະໝາຍຄວາມວ່າມາດຕະຖ່ນຄິດໄລ່ໄຟຟ້າຂອງ ມະຫາວິທະຍາໄລ ຊູ່ໂຈ່ແມ່ນ 1KWh/0.6 ຢວນເນາະ, ເຊິ່ງໃນເດືອນໜຶ່ງ ໃຜຊິໃຊ້ຫຼາຍຊ່ຳໃດ ມັນກະແລ້ວແຕ່ຄວາມຕ້ອງການສ່ວນໂຕຂອງໃຜລາວເນາະ, ບາງຄົນອາດໃຊ້ 100 度，200度 ຫຼື 300 度ກະມີ.​ ນອກຈາກນີ້ອ່າຢີຍັງບອກຂ້ອຍອີກວ່າມະຫາວິທະຍາໄລຊູ່ໂຈ່ໃຈດີຫຼາຍ ເພິ່ນໄດ້ມອບ “ທຶນການສຶກສາ” ເປັນຄ່າໄຟນ້ອຍໆໃຫ້ແກ່ນັກຮຽນຕ່າງປະເທດໝົດທຸກຄົນທີ່ນອນຢູ່ໃນຫໍພັກຂອງໂຮງຮຽນ, ເຊິ່ງຕົກຢູ່ຄົນລະ 30 ຢວນ/ເດືອນ (ໝາຍຄວາມວ່າທຸກຄົນໄດ້ໃຊ້ໄຟຟຣີ 30 ຢວນ/ເດືອນ, ເຊິ່ງອ່າຢີຈະຫັກອອກຈາກຄ່າໄຟທັງໝົດໃຫ້ແບບອັດຕະໂນມັດ, ໂດຍບໍ່ໃຫ້ເຮົາຕ້ອງໄປຄິດໄລ່ເອງໃຫ້ເຈັບຫົວ).

ແລະເພື່ອບໍ່ໃຫເປັນການເສຍເວລາ, ຕໍ່ໄປນີ້ແມ່ນວິທີການຄິດໄລ່ຄ່າໄຟທີ່ຂ້ອຍອາລຳພະບົດມາແຕ່ຕົ້ນ, ເຊິ່ງເອົາຫ້ອງຂ້ອຍເປັນຕົວຢ່າງເນາະ.

ເດືອນແລ້ວນີ້ຂ້ອຍໃຊ້ໄຟໄປ 120度, ເອົາ 120度 ມາຄູນກັບ 0.6 ຢວນເພື່ອໃຫ້ໄດ້ຄ່າໄຟທັງໝົດ (ຕາມມາດຕະຖານ 1度/0.6ຢວນ). ກະຊິຖືກຢູ່ 72 ຢວນ, ແລ້ວເອົາມາລົບກັບ “ທຶນການສຶກສາ” 30ຢວນ ທີ່ໂຮງຮຽນມອບໃຫ້, ກໍ່ເປັນ 72-30 = 42 ຢວນ. ໝາຍຄວາມວ່າຄ່າໄຟເດືອນແລ້ວນີ້ຂອງຂ້ອຍແມ່ນ 42 ຢວນ.

ໝາຍເຫດ: ທຶນການສຶກສາແມ່ນ 30/ຄົນເດີ້, ຖ້າຫ້ອງໃດນອນ 2 ຄົນກໍ່ແມ່ນ 60 ຢວນເດີ້, ຄິດໄລ່ໃຫ້ຖືກເດີ້ທຸກຄົນ.

ຖ້າມີຄຳຖາມຫຍັງກໍ່ຖາມຂ້ອຍໄດ້. ລັດ.