ຈາກພູມປັນຍາສຽວສະຫວາດ: "ເປັນຂຸນນາງບໍ່ມີບ່າວໄພ່ອ້ອມຂ້າງກໍ່ຢ່າອວດອ້າງຍໍໂຕ"

ເຫັນວ່າຖານະຊັ້ນ ສະໜອງກຽດສັກສີ

ຕຳແໜ່ງມີ ຄາຄຸຍ ຂ່າວໂຄປະໂທຮ້າຍ

ບໍ່ແວ່ມາຢາມຢ້ຽມ ປະຊາຊົນຊາວໄຜ່

ເຫັນວ່າເປັນໃຫຍ່ແລ້ວ ລືມເຊື້ອລາດສະດອນ ບໍ່ດີເດີ

ຢ່າງົງ ງອນອວດອ້າງ ວາງທ່າແຂນຂົງ

ບໍ່ຄິດລົງເຖິງຖອງ ຮາກຖານປະຊາເຊື້ອ

ເຫຼືອແຕ່ກົດຊົງເຊີ້ ລະເມີເມົາມົວອົ່ງ

ແຂນຂົງ ຫຼົງຫຼ່ຽມສົ້ງ ສະຫວົງໂມ້ວ່າແຕ່ໂຕ ບໍ່ເປັນບໍ?

ພະນັກງານຊັ້ນສູງ ຜູ້ເປັນຫຼັກເປັນໃຫຍ່ ຜູ້ເປັນເຈົ້າເມືອງເຈົ້າແຂວງ ຫຼື ຜູ້ມີຕຳແໜ່ງໜ້າທີ່ສຳຄັນອື່ນໆ ຄົນລາວບູຮານເອີ້ນວ່າ: ເປັນຂຸນທັງນັ້ນ. ບັນດາຂຸນນາງເຫຼົ່ານີ້ ຖ້າຫາກວ່າ ບໍ່ມີປະຊາຊົນ ຫຼື ມະຫາຊົນຫ້ອມລ້ອມ ອ້ອມຂ້າງເປັນກຳລັງແຮງໃຫ້ການສະໜັບສະໜູນແລ້ວ ກໍ່ປຽບເໝືອນເສື ບໍ່ມີແຂ້ວບໍ່ມີເລັບ, ທະນູບໍ່ມີສາຍ, ສວນອຸທິຍານບໍ່ມີຮົ້ວລ້ອມ. ໝາຍຄວາມວ່າ ເປັນຂຸນນາງຜູ້ຊົງກຽດສູງສັກໃນຕຳແໜ່ງ ແຕ່ຂາດອຳນາດ ແແລະ ອິດທິພົນ.

ດັ່ງນັ້ນ ຜູ້ທີ່ເປັນນາຍຄົນ (ຂຸນນາງຜູ້ໃຫຍ່) ທີ່ບໍ່ມີມະຫາຊົນ ຫຼື ປະຊາຊົນເປັນກຳລັງແຮງ, ບໍ່ມີຄວາມສາມາດທີ່ຈະເອົາຊະນະໃຈ ແລະ ເຂົ້າໄປນັ່ງຢູ່ໃນມະໂນລົມ ແຫ່ງຄວາມຮັກຂອງເຂົາເຈົ້າໄດ້ ດັ່ງກ່າວມານີ້ ກໍ່ບໍ່ຄວນອວດອົ່ງທະນົງຕົວ ກົ່ງແຂນ ແບ່ນໜ້າເອິກ ວ່າໂຕເປັນຜູ້ຄອງອຳນາດ ແລະ ຄວາມນິຍົມຊົມຊອບຈາກມະກາຊົນ. ທາງທີ່ດີ ຄວນຈະປ່ຽນໃຈປັບປຸງປ່ຽນແປງແນວຄິດ ທັດສະນະໃໝ່ໃຫ້ຖືກຕ້ອງສອດຄ່ອງດີແລ້ວ ຟ້າວຫັນໜ້າເຂົ້າຫາປະຊາຊົນ. ສ້າງຜົນງານສ້າງຄວາມເຊື່ອໝັ້ນ ປູກປັ້ນຄວາມຮັກແພງສາມັກຄີໃນໝູ່ມະຫາຊົນຢ່າງເລິກເຊິ່ງກວ້າງຂວາງ ເຮັດໃຫ້ເຂົາເຈົ້າເຄົາລົບນັບຖື ແລະ ຮັກຫອມຖະໜອມແພງ. ຄວນຖືຄະຕິທີ່ວ່າ. ຮາກຖານປະຊາຊົນຄືກຳແພງເພັດທີ່ເພິ່ງພາອາໄສອັນແຂງແກ່ນແໜ້ນໜາ ປະຊາຊົນຄືເລືອດລ້ຽງຮ່າງກາຍຂອງຕົນຢ່າງບໍ່ມີວັນບົກແຫ້ງ. ຫາກເຮັດໄດ້ຄືດັ່ງກ່າວມານີ້ ເຊື່ອໝັ້ນວ່າປະຊາຊົນທົ່ວບ້ານທົ່ວເມືອງ ຈະໃຫ້ການຍ້ອງຍໍສັນລະເສີນ ນິຍົມຊົມຊອບ ສະໜັບສະໜູນ ຄຽງບ່າຄຽງໄຫຼ່ກັນເປັນແກ່ນກຳລັງດັນອ້ອມຂ້າງ ແລະ ນັບຖືວ່າປັນຂຸນນາງ ຫຼື ຜູ້ນຳທີ່ເປັນແບບຢ່າງທີ່ດີຕະຫຼອດໄປ.

ອີກປະການໜຶ່ງ ເພິ່ນຄົງຈະເຕືອນບອກຜູ້ທີ່ມີຍົດມີສັກສູງວ່າ ໃຫ້ຕັ້ງໝັ້ນຢູ່ໃນຫຼັກການແນວທາງທີ່ເປັນທຳ ມີທັດສະນະມະຫາຊົນສູງ ເຂົ້າເຖິງໃຈຂອງປະຊາຊົນ ບັນດາເຜົ່າທຸກຊັ້ນຄົນ ໂດຍບໍ່ເລືອກຖານະເພດໄວ. ກ້າໃຫ້ນ້ຳໃຈໃຫ້ຄວາມເມດຕາຮັກແພງ ໃຫ້ແສງສະຫວ່າງທາງຊີວິດ ແລະໃຫ້ອະນາຄົດອັນສົດໃສແກ່ເຂົາເຈົ້າ.